
Ijumaa asubuhi tarehe 30.10.2026;
1 Timotheo 6:3-10
3 Mtu awaye yote akifundisha elimu nyingine, wala hayakubali maneno yenye uzima ya Bwana wetu Yesu Kristo, wala mafundisho yapatanayo na utauwa,
4 amejivuna; wala hafahamu neno lo lote; bali ana wazimu wa kuwazia habari za maswali, na mashindano ya maneno, ambayo katika hayo hutoka husuda, na ugomvi, na matukano, na shuku mbaya;
5 na majadiliano ya watu walioharibika akili zao, walioikosa kweli, huku wakidhani ya kuwa utauwa ni njia ya kupata faida.
6 Walakini utauwa pamoja na kuridhika ni faida kubwa.
7 Kwa maana hatukuja na kitu duniani, tena hatuwezi kutoka na kitu;
8 ila tukiwa na chakula na nguo tutaridhika na vitu hivyo.
9 Lakini hao watakao kuwa na mali huanguka katika majaribu na tanzi, na tamaa nyingi zisizo na maana, zenye kudhuru, ziwatosazo wanadamu katika upotevu na uharibifu.
10 Maana shina moja la mabaya ya kila namna ni kupenda fedha; ambayo wengine hali wakiitamani hiyo wamefarakana na Imani, na kujichoma kwa maumivu mengi.
Mwenye haki ataishi kwa imani;
Paulo anamuandikia Timotheo akikemea kufundisha elimu nyingine tofauti na Injili iokoayo. Anasema hayo mafundisho mengine huleta husuda, ugomvi, matukano, shuku mbaya, maelewano mabaya n.k Paulo anasisitiza mafundisho ya neno la Mungu ili kujiandaa na maisha yajayo maana kila mmoja ataondoka mtupu kama alivyokuja mtupu. Paulo anaendelea kukemea tamaa ya mali, maana neema ya Mungu yazidi vitu vyote.
Kwa hiyo Paulo anakemea mafundisho ya uongo, badala yake anaelekeza Injili ya kweli, anahimiza kutokuwa na tamaa ili kuutazamia mwisho mwema. Injili ya kweli ni ile ihubiriyo neema ya Mungu na kuhimiza msamaha, toba na imani ya kweli. Tukizingatia hayo tutaufikia mwisho mwema. Amina
Siku njema
Heri Buberwa
